الحلم المفقود

ايطاليا

غرق الشباب المصرى أثناء محاولة الهجرة الغير شرعية الى ايطاليا

عندما يكون الهروب من الوطن فى رحلة نسبة الموت والفشل فيها90%... فماذا يكون هذا الوطن

فإذا قررت أن تعيش فى وطنك وتكتفى أنت وأولادك بأكل البطاطس المسلوقة فقط بالعيش والطماطم فإن عليك دفع 10 جنيهات فى اليوم أى فى الشهر 300جنيهه بطاطس مسلوقة وعيش فقط
فكيلو البطاطس ب3جنيهه أى 2كيلو ب6جنيههوب2جنيهه عيش وب2جنيهه طماطم
وطبعا لوابنك تعب مفيش دكتور...دكتور إزاى...وفلوس الكشف والدواء والذى منه
ومفيش تعليم...تعليم ايه..ده الكشكول الواحد بجنيهه
وطبعا مفيش خروج من البيت...خروج إزاى..فحتى تصل من الهرم الى الجيزة مثلا فبتدفع بالقليل جنيهه ونصف إن لم يكن أكثر لأن سائقى الميكروبصات الأفاضل بيقسموا الطريق محطات
ده طبعا على أساس إنك هتستحمل زحمة المواصلات والوقوف بالساعات
وأوعى تتخيل إن فيه حاجة أسمها شغل...طب والقهاوى معمولة ليه
عرفتوا ليه الشباب اللى غرق ده فعلا ملوش حق
معقول إنسان يهرب من البلد الجميل ده

وطن

وطن

تلك الكلمة التى أشعر لها بحنين وشوق غامر
تلك الكلمة التى تسيل دموعى وأنا أسمعها فى أنشودة
ما أخترنا حبك يا أوطان لكن الله قد أختارا
حب الأوطان من الإيمان إنا لا نعلن أسرارا
ولكن
يعنى ايه كلمة وطن
هل يعنى حزن أم فرح؟
هل يعنى ألم أم سعادة؟
أم يعنى فقر وموت تحت الأنقاض!!!
أم يعنى نهب وسرقة!!!
أم يعنى بطش الشرطة وإجرام أمن الدولة!!!
أم يعنى محاكمة الأبرياء وتكريم المجرمين!!!
أم يعنى البطالة أم زحمة الموصلات أم أطفال الشوارع أم ...أم...أم
أم ماذا تعنى كلمة وطن؟
مهما تعنيه تلك الكلمة....سأظل أعشق هذا الوطن...سأظل أعشق تراب هذا الوطن
سأظل أحلم بذلك اليوم الذى يفتح لنا ذلك الوطن ذراعيه
سأظل أحن دائما اليه...

ولكن...فعلا يعنى ايه وطن؟
أعتقد أن الوطن ليس فقط سماء وأرض
أعتقد أن معنى الوطن أكبر من ذلك بكثير
ولكن ...يعنى ايه وطن؟